لیبیا جانے والے امریکی شہریوں کو سنگین خطرات سے خبردار کر دیا گیا
(ویب ڈیسک): امریکا نے لیبیا کا سفر کرنے والے اپنے شہریوں کو ایک بار پھر سخت ترین سفری انتباہ جاری کرتے ہوئے ملک کا سفر کسی بھی مقصد کے لیے نہ کرنے کی ہدایت کی ہے۔
امریکی محکمہ خارجہ کی جانب سے لیبیا کے لیے لیول 4 کا ’’ڈو ناٹ ٹریول‘‘ ایڈوائزری برقرار رکھی گئی ہے۔ اس میں جرائم، دہشت گردی، اغوا، بدامنی، صحت سے متعلق خطرات اور بارودی سرنگوں سمیت متعدد سنگین خطرات کی نشاندہی کی گئی ہے۔
امریکی حکام کے مطابق لیبیا میں مسلح گروہوں اور حکومتی فورسز کے درمیان کسی بھی وقت جھڑپیں شروع ہوسکتی ہیں، جبکہ ملک میں ہتھیاروں کی موجودگی بھی وسیع پیمانے پر ہے۔ جرائم پیشہ گروہوں کے حوالے سے بھی خبردار کیا گیا ہے جو انسانی اور منشیات کی اسمگلنگ سمیت دیگر غیر قانونی سرگرمیوں میں ملوث ہیں۔
سفری انتباہ میں کہا گیا ہے کہ لیبیا میں اغوا کا خطرہ وسیع پیمانے پر موجود ہے اور ماضی میں امریکی شہری بھی اغوا کاروں کا نشانہ بن چکے ہیں۔ بعض علاقوں میں ٹارگٹ کلنگ اور دیگر پرتشدد واقعات کا خطرہ بھی موجود ہے۔
امریکی شہریوں کو مشورہ دیا گیا ہے کہ اگر وہ کسی انتہائی خطرناک ملک کا سفر کرنے کا فیصلہ کرتے ہیں تو سفر سے قبل اپنی اہم قانونی اور مالی دستاویزات مکمل رکھیں۔ ان میں وصیت، زندگی کے آخری مراحل سے متعلق ہدایات، انشورنس بینیفشریز کا تعین اور پاور آف اٹارنی جیسے انتظامات شامل ہیں۔
محکمہ خارجہ نے خاص طور پر ہدایت کی ہے کہ مسافر ہنگامی صورتحال میں ملک سے نکلنے کا ایسا منصوبہ پہلے سے تیار رکھیں جو امریکی حکومت کی مدد پر منحصر نہ ہو۔
لیبیا میں اس وقت امریکی سفارتخانہ موجود نہیں، جبکہ سکیورٹی کی صورتحال کے باعث امریکی حکومت کے لیے وہاں موجود اپنے شہریوں کو ہنگامی خدمات فراہم کرنا بھی محدود یا ناممکن ہوسکتا ہے۔
حکام نے دہشت گرد حملوں کے خطرے سے بھی خبردار کیا ہے جو کسی پیشگی اطلاع کے بغیر ہوسکتے ہیں۔ اسی طرح مظاہروں کے دوران صورتحال اچانک پرتشدد ہونے اور سڑکوں، ٹرانسپورٹ اور دیگر بنیادی سہولیات میں خلل پڑنے کا خدشہ بھی ظاہر کیا گیا ہے۔
لیبیا میں بارودی سرنگیں اور جنگی علاقوں سے بچ جانے والا غیر پھٹا ہوا اسلحہ بھی ایک بڑا خطرہ ہے۔ امریکی حکام نے مسافروں کو سڑکوں کے کناروں، گڑھوں، غیر واضح راستوں اور غیر نشان زدہ ٹریلز سے دور رہنے کی ہدایت کی ہے اور کسی بھی مشتبہ دھماکا خیز شے کو ہاتھ نہ لگانے کا مشورہ دیا ہے۔
امریکی محکمہ خارجہ کا واضح مؤقف ہے کہ موجودہ سکیورٹی حالات کے پیش نظر امریکی شہریوں کو لیبیا کا سفر نہیں کرنا چاہیے۔