اٹلی میں پولیس کی کارروائی، سارڈینیا میں بین الاقوامی انسانی اسمگلنگ نیٹ ورک پکڑا گیا
(ویب ڈیسک) اٹلی کے جزیرے سارڈینیا میں پولیس نے انسانی اسمگلنگ میں ملوث ایک بین الاقوامی نیٹ ورک کو بے نقاب کرتے ہوئے 8 مشتبہ اسمگلروں کو گرفتار کر لیا ہے۔ ملزمان پر الزام ہے کہ انہوں نے الجزائر کے ساحلی علاقے سے درجنوں تارکین وطن کو غیر قانونی طریقے سے اٹلی پہنچایا۔
اطالوی حکام کے مطابق 6 اگست کو پولیس نے کارروائی کرتے ہوئے اس نیٹ ورک کو ختم کیا، جو الجزائر کے ساحل سے تارکین وطن کو کشتیوں کے ذریعے سارڈینیا منتقل کرنے میں ملوث تھا۔ خبر رساں ادارے اے این ایس اے کے مطابق اس گروہ نے کم از کم 60 افراد کو غیر قانونی طور پر اٹلی پہنچایا۔
حکام کے مطابق اسمگلروں کا یہ گروہ شمالی افریقی ملک الجزائر کے مشرقی ساحلی شہر الکالا سے چھوٹی کشتیوں کے ذریعے تارکین وطن کو اٹلی کے جزیرے سارڈینیا منتقل کرتا تھا۔ ہر سفر میں بحیرہ روم کے خطرناک پانیوں سے تقریباً 200 کلومیٹر کا فاصلہ طے کیا جاتا تھا۔
مقامی حکام کے مطابق یہ نیٹ ورک تارکین وطن کو اٹلی پہنچنے کے بعد وصول کرنے، جعلی دستاویزات تیار کرنے اور اپنے ساتھیوں کو دیگر ضروری انتظامی و عملی معاونت فراہم کرنے کا بھی ذمہ دار تھا۔
اطلاعات کے مطابق اس نیٹ ورک کے ذریعے اٹلی پہنچنے والے زیادہ تر تارکین وطن کا تعلق الجزائر اور اس کے پڑوسی ملک تیونس سے تھا۔
فرانسیسی خبر رساں ادارے اے ایف پی کے مطابق ہر تارک وطن سے غیر قانونی سمندری سفر کے عوض 2,500 یورو تک وصول کیے جاتے تھے، جبکہ ہر سفر میں تقریباً ایک درجن افراد کو کشتی کے ذریعے بحیرہ روم عبور کرایا جاتا تھا۔
اطالوی حکام نے بتایا کہ انہیں حالیہ مہینوں کے دوران کم از کم پانچ ایسے سمندری سفر کا علم ہوا ہے۔ حکام کے مطابق تحقیقات کے دوران نیٹ ورک کے دیگر ممکنہ ارکان اور اس کے ذریعے اٹلی پہنچنے والے افراد سے متعلق مزید معلومات بھی سامنے آنے کا امکان ہے۔
اٹلی اور دیگر یورپی ممالک بحیرہ روم کے راستے ہونے والی غیر قانونی ہجرت اور انسانی اسمگلنگ کے خلاف کارروائیاں جاری رکھے ہوئے ہیں، جبکہ خطرناک سمندری راستوں کے باعث تارکین وطن کی زندگیوں کو بھی سنگین خطرات لاحق رہتے ہیں۔